涉嫌洗黑錢等多項控罪棄保潛逃逾2年嘅「上海仔」郭永鴻，早年返港被捕後，至今仍在保釋。有讀者報料指昨晚（11日）7時許，喺中環IFC商場後門見到郭永鴻蹤影，當時身旁只得一個保鑣保護佢上車，其間有一名市民行過，保鑣都大為緊張。

讀者提供嘅片段所見，郭永鴻搭扶手電梯到地面時，都緊握扶手，喺佢身後嘅保鑣就不時望向後方。另一段片段則見保鑣已走到私家車旁，見到郭永鴻就到時才開車門，但其間郭步伐緩慢，走動不太靈活，由車頭走到後座再上車用上約10秒時間；而郭上車後，可見到他撥了一、兩下頭髮。

外號「上海仔」嘅郭永鴻係黑幫「和勝和」前坐館，2016年7月由泰國布吉返港時，在機場被警方拘捕。當時他涉嫌「串謀勒索」、「串謀刑事恐嚇」及「串謀傷人」3宗罪；至2017年11月再被捕，當時他涉嫌於2007年1月至2012年7月間，透過本地銀行戶口清洗黑錢，並涉及過億元金額。他其後獲准保釋候查，不得離港，但翌年4月棄保潛逃，被警方通緝。

直至去年11月，郭永鴻由杜拜經曼谷抵港時，再被警方拘捕。他涉嫌兩項「串謀傷人」、一項「串謀刑事毀壞」及一項「刑事誹謗」，據傳媒近日報道，警方稱沒有足夠證據對郭提出檢控，他已獲無條件釋放。

#上海仔 #郭永鴻