為咗幫已經收購咗嘅士多宣傳，TVB到底可以去到幾盡？大台《東張西望》早前又出事，節目請來K Kwong教人分辨KF94口罩真假，期間K Kwonng直指「無香港廠生產到KF94」，之後主持就教人上士多買一隻聲稱韓國製嘅ProClean KF94口罩。士多受惠於節目，當晚之後一度有超過4,000人上網排隊搶罩。
然而香港口罩生產商「SAVEWO 救世」其實當時已經拎到韓國嘅認證，K Kwong隨即被網民圍插講「Fake News」，他於網上發聲明，指接受訪問當時仍未知「救世」已獲韓國認證為合資格的KF94生產商，又貼上「救世」的認證資料佐證。K Kwong又聲稱自己「被坑」，解釋於節目所驗的口罩樣本與士多所售的不同，「我手上嘅sample 唔同朋友係佢哋網站買到嘅貨。我驗A，佢賣B」、又話「我其實無介紹佢（士多口罩），佢Cut到利用我同佢賣廣告」。
被冤枉的「救世」之後更加出片「直線抽擊」，指他們測試士多口罩後發現，它們的過濾率奇低，在非油性及油性的測試中，過濾率僅分別有約47%及41%，比「救世」口罩低超過一倍。
事件經FB專頁「 思思 TVB 的二三事」整合，唔少網民都有向通訊管理局投訴《東張》散播不實資訊，但睇嚟成功機會不大～根據思思TVB團隊所指，之前其實有同類Case，但通訊管理局就話「現行規管廣播服務的法例、牌照條款或業務守則並無條文規管資訊娛樂節目內容的準確性」、「有關事宜並不屬通訊局處理廣播投訴的範圍」。唔通《東張》內容唔準確，觀眾都無得拗？咁唔怪得知之前可以話斑馬線唔洗停車啦～
