《全民造星IV》20強名單終於喺噚晚嗰集揭盅，但令Channel絲最深刻嘅唔係邊個留低邊個走，而係阿Jer嘅眼淚呀！
由柳應廷（Jer）帶領嘅「Jer組」成員有Alice、Gao、阿蛋、方方同子涓。身為MIRROR唱歌擔當嘅Jer，無為呢組編排一般跳唱表演，而係揀咗首有返咁上下難度嘅歌——陳蕾嘅《沙盤》。雖然首歌難唱，但排練嘅時候組員都有讚Jer畀咗好大嘅信心佢哋，亦都好用心教佢哋歌唱技巧。然而，或者係首歌意念太深奧，即使開咗研討大會，比賽當日嘅表現亦都唔太得評判歡心。
Jer同組員為表演準備咗唔少道具，但最後就被批評個表演太多嘢、想表達嘅嘢太多，變得「流於表面」。祖堯同花姐更加輪流發炮，話呢組野心太大、演得過火，Enjoy唔落。而Alfred就讚阿蛋裝扮同唱功都有突破，成功證明到自己。
雖然評語彈多過讚，但當全場都以為呢組唔會太低分嘅時候，呢組嘅總分竟然只得213.2分，連肥仔、阿Dee、Lokman、AK都忍唔住O晒咀。評判同導師一齊商議淘汰人選嘅時候，Jer更加一路喊一路忍唔住同花姐講「覺得唔公平」，但花姐就撻返Jer轉頭，話「比賽從來都唔公平」，仲重提Jer喺《造星I》第1回合就被淘汰嘅事。
最尾節目宣佈要淘汰Kinki、方方、子涓、阿蛋同馬欣。20強塵埃落定，有唔少網民都好驚訝唱功穩定嘅Kinki同Keep住進步嘅阿蛋會被淘汰，仲為Jer呢組抱不平，認為無論如何都唔會係包尾。可憐嘅Jer⋯⋯等我幫你抹走啲眼淚。
過咗淘汰環節之後，節目播出20強成員嘅入圍感想，方便觀眾睇完再去投票。而潮流興未選先告急，旁白師呼籲大家集中票源，票投世一嘅1號Ivy So！！！！
