周三晚（10日）播出嘅《全民造星IV》承接返上集16歲參賽者Ariel（曾家瑩）嘅跳舞演出（欲知詳情可參考呢度： https://bit.ly/309DFc3 ），佢嘅對手係被網民稱為「女版Ian（陳卓賢）」嘅何佩（何佩婷）。旁白君都話何佩笑容同Ian一樣有親和力，而且彈結他自彈自唱風格都好相似，就連主持強尼都話「Ian拍劇我幫佢搵咗個妹」。
何佩之前好鍾意busking同創作歌曲，佢YouTube頻道都有唔少自彈自唱嘅短片，亦曾有出鏡機會，但就對自己好多質疑，會覺得自己做得唔好，直至近日終於對舞台有渴望，有決心想做歌手，「好想可以畀多啲人見到自己。」不過，原來咁大轉變，係因為男友去年過身，所以今次參賽目的都想為男友做少少嘢︰「我做音樂路上佢好支持我，可能好sad，但係都係人生其中一個過程，所以我覺得用歌寫低好好，聽返可以知道自己經歷過啲咩」，佢亦希望自己嘅故事可以安慰同治癒到其他人。
到正式比賽，何佩自彈自唱表演原創曲《Unknown》，用佢嘅治癒聲線唱出自己嘅經歷，評判朱栢康聽完都話「係有feel嘅」，亦到觸動到佢，而且聽得出係有經歷喺入面；鄭融亦都形容佢係「治癒系」。最終何佩以3盞紅盞成功晉級60強，並加入導師許廷鏗（Alfred）嘅A隊。至於表演Popping嘅Ariel，評判都話佢演出唔係唔好，但因為已經有類近嘅參賽者。雖然Ariel跌入復活區，不過Alfred都話，兩個「邊個輸咗我都會救」。
跟住嗰場對決係參加過ViuTV《廣告女皇》、樂隊The Cooper主音阿杰（周芷慧）同17歲嘅Ariels（張瑞芝）。Ariels唱功連Alfred都話冇得救，跳舞都唔叻，面試嗰陣仲作嘔，MV驗收當日亦再跳到嘔，嚇親唔少工作人員。喺比賽同拍檔合作表演戲劇，但全程冇對白又冇表情，開始無耐已搞到花姐睇到「唉」一聲，仲大嗌想瞓覺，導師梁祖堯仲話佢個影子拍檔表現更好。
而正當大家睇好演出經驗較豐富嘅阿杰時，佢喺表演唱歌一開頭即怯場甩嘴，令大家都非常意外，佢自己演出完都忍唔住扁嘴。Alfred都話，如果作為評判，按表演完整性無可能揀阿杰，所以阿杰自己都打定輸數，但結果佢得到3盞紅燈順利晉級。得悉賽果一刻，阿杰都好愕然，最後仲忍唔住眼濕濕，「覺得自己好錯，無可能繼續落去」。因為覺得於心有愧，所以阿杰都承諾會加倍努力，「我更加會證明畀大家睇我係有能力繼續留低。」
之後輪到同樣係18歲嘅Kinki（盧芷韻）同嘉嘉（張嘉慧），佢哋都被形容為「troble-makers」。兩位都係表演唱歌，Kinki就唱《Treasure》，朱栢康就覺得未夠吸引，雖然有唱歌技巧，但「成件事未一致」。至於嘉嘉演唱《Tokyo Eyes》就帶點詭異味道，花姐一見到佢造型都已大嗌「女鬼呀」，之後仲3度話「唔鍾意佢」，又話佢造作，朱栢康都話嘉嘉演出令佢有心寒感覺，最後Kinki以2盞藍燈險勝嘉嘉。雖然跌入復活區，但嘉嘉表現仍甚high，被工作人員問到有冇後悔揀呢首歌時，佢都話「唔後悔。」
至於最後一輪對決係Mei Mei（曾美欣）對Miko（任佳慧），佢哋都因為唔同原因放低跳舞多年。Mei Mei先出場以跳唱迎戰，表現穩定，Alfred形容「每樣嘢60分，起碼唔乞人憎」，花姐都話「好似都唔差」。Miko嘅跳舞表演亦穩定，正當花姐同阿祖都估係佢勝出時，結果Mei Mei以3盞藍燈勝出；Miko聽到結果都好失望，之後仲淚灑後台。
