《全民造星IV》每一集都有驚喜，而個「驚」係評判畀觀眾嘅。有邊個會估到，喺MV以「寶礦力」Feel青春氣息脫穎而出嘅Yoyo，會不敵唱歌扮型嘅中性Dru吖⋯⋯仲要係一盞燈都拎唔到！
第九集嘅第一場對決就係Yoyo Vs Dru。29歲嘅Dru話，中性打扮嘅成員可以為女團帶嚟特色，但花姐喺面試嘅時候就一眼睇中樣子甜美嘅Yoyo，仲話「寧願唔要MIRROR都要佢」。雖然中性感覺嘅女團成員都可以好吸引，例如韓國f(x)嘅Amber、短髮嘅Twice定延等，但歌喉未見特別出色嘅Dru，喺表演嘅時候，似乎比較平平無奇。而可以靠樣做花瓶嘅Yoyo，就用台灣樂團F.I.R嘅歌《Lydia》編排咗唱歌同跳舞表演，雖然表情管理可以再好啲，但聲線悅耳、跳舞唔錯，Channel絲以為佢入硬圍⋯⋯可惜，Yoyo最尾以三盞藍燈輸俾Dru，要跌入復活區，而梁祖堯就代表「LGBT」Pick Dru入佢組。唔少網民對評判嘅決定大感驚訝，話越嚟越唔明評判嘅準則，「係咪靚女就要跌入復活區等人救㗎？」
跟住落嚟嘅就係跳開舞嘅2Ling Vs 「家燕媽媽門生」榛綦。Dancer 2-Ling今次挑戰自己唔齋跳熱舞，而係跳唱《未知》嘅2-Ling，但花姐就嫌2Ling唱得難聽，仲不停扮佢走音。至於18歲嘅榛綦，自細跟開家燕媽媽出去表演跳舞，練得一身好舞藝。打扮已經就有股韓星味嘅佢，一出場果然有返咁上下，啲舞係咁多集以嚟少見嘅有Power，唱歌都無走音，連評判都讚佢掌握得好好。最搞笑嘅係，當奴話榛綦表演神情同鄭融有幾分似，鄭融聽完之後竟然感慨咁喊咗出嚟，話好似見到以前嘅自己。話晒都似鄭融，最後榛綦都無令人失望，三盞紅燈全取，進入梁祖堯嘅組別。
最尾呢場對決非常精彩，就係由打入上屆20強嘅方方，對上被稱「翻版炎明熹」嘅Marf（Channel絲表示除咗髮型邊到似）。方方帶一眾Dancer夥伴上台表演跳唱《Mulan》，可惜花姐同評判都嫌伴舞太多，令方方自己嘅表現唔夠突出。至於Marf，喺面試嘅時候已經見到佢全能嘅一面，唱歌獲Alfred讚賞，連即場演出都同梁祖堯對答如流。Marf上台時以跳《Pass that Dutch》迎戰方方，一上台即刻勁有台型，舞蹈動作亦都相當有節奏感，真係「Marf Power Powerful」～連三位評判都忍唔住喺表演完咗嗰陣舉高雙手拍手。Marf最後憑精彩演出晉身60強，而方方則跌入復活區，希望方方可以再戰歸來啦！
