《全民造星IV》第3回合Battle，今集首先出場嘅係跳舞不得了嘅A4組，隊長係芯駖，成員就包括So Ching、Win Win、筠兒、超酸同子涓。佢哋帶嚟嘅跳唱《Lady Killa》，成功帶動全場氣氛，連肥仔都睇到好投入。評判鍾舒漫（Sherman）就大讚WinWin Rap功紥實，令佢對A4嘅表演有信心，聽到導師Alfred大為感動，「不枉等棉乾絮濕湊大你哋！」。而之前話過另一組表演似「夜總會」嘅評判陳輝陽，就話因為每個成員都好有個性，所以好欣賞A4組嘅裝束。
相比起A4組「完全唔識唱歌」，佢哋嘅對手B2組就俾梁祖堯形容為係「唱功擔當」嘅一組，隊長係Liu哥、成員有Ana、Ash、Winka、阿Mic、鐵鐵。B2組相處開心和諧，即使唔識樂理嘅Ash同鐵鐵跟唔上進度，其他組員都好樂意教返佢哋。佢哋上台演出嘅係唱歌表演《相信一切是最好的安排》，本身好鍾意呢首歌嘅Channel絲，覺得睇呢個演出就好似見到佢哋平時點樣互相鼓勵一樣，而成員之間嘅好感情都流露晒喺啲細節入面，例如Winka有時會拖住Ash一齊唱，好warm。雖然陳輝陽話睇唔到主題同突出嘅地方，但呢個表演已經打動咗Channel絲～
跟住落嚟就係兩組嘅Dance Battle，A4組照舊型格，而B2組就換上學院風打扮，一出場已經見到明顯對比。雖然B2組已經好努力跳，始終不敵對面嘅幾位跳舞能手，結果綜合兩個表演，評判入面只有少爺占俾紅燈B2組，要淘汰一名成員。起初實力唱將阿Mic同Ash各獲2「淘汰票」，評判再投一次後，Ash獲3票，出局塵埃落定。Ash被淘汰嘅畫面，除咗震驚咗咁多位觀眾，連當時嘅花姐同梁祖堯都R爆頭。Ash發表臨別感言時坦言自己未算發揮得最好，「我返去做護士唔係一件難事，但佢哋好有音樂夢想」，聽到其他成員都忍唔住落淚，「我之後喺節目到見到你哋每一個，我都會好開心同屋企人講『呢個係我嘅Team mate！』，你哋一定要加油！」，Ash講完呢一句，就連台下其他參賽者都忍唔住淚流成河。強尼講得啱，Ash留喺呢個圈子，一定好多觀眾都好期待，希望會再係電視見到你同你嘅B2組成員啦，Ash！
