叱咤頒獎禮上唔少得獎歌手、音樂人留下感人發言，其中黃偉文（Wyman）更多謝MIRROR及背後團隊對廣東歌有抱負。憑《狂日人記》首次打入叱咤十大嘅Jer柳應廷開首亦話「感謝曾經因為Mirror重新留意香港的你」，亦感謝MIRROR兄弟嘅陪伴「喺亂流中一齊走過」。Jer相信「香港樂壇一定會越來越好，我哋做嘅作品、做嘅表演一定可以再次踏上世界舞台。」
Jer喺帖文表示，2021年「大家都經歷過很多，但我生於這城市，很愛這地方，大家要重新振作」。佢又感謝曾經談論MIRROR的所有人，「無論好與壞...我哋Mirror每一位，由選擇出道果（嗰）一刻，就算面對洪流，都唔會退縮。」對於因為MIRROR而留意不同音樂創作單位、重新投資本地新晉音樂人、重新留意娛樂圈的每一位，「其實未必每一位都一定要消費支持，但每人嘅一個小小行動，留意多一下香港同朋友討論多一下音樂圈，娛樂圈就會因為咁而推動。」
除咗JER，MIRROR呢幾日都喺社交平台出po講感受。Stanely邱士縉感謝公司同曾經幫助過Mirror嘅人同fans外，亦「多謝聽返廣東歌／一直聽緊廣東歌嘅樂迷」；未來佢會「繼續緊守自己小小的崗位，努力學習、努力的唱，「雖然香港樂壇成為亞洲第一看似是一場夢，就如三年前我也沒有想過會在叱咤台上唱歌，會開演唱會，會有粉絲喜歡自己，會成為一位演員。 目標夠遠大，奇蹟才會出現嘛！」Stanely希望大家要「相信香港樂壇，香港影壇，百花才能齊放」。
姜濤亦都話2021對佢嚟講既漫長又短暫，漫長係因為經歷好多悲歡離合；短暫就係自己未逐一改善自身好多缺點，同埋有好多要做嘅事仲未好好完成。但佢好感支持同陪伴佢走過呢一年嘅每一位，包括MIRROR兄弟、工作人員、姜糖們等，「我會努力，希望有一日可以做到對得住『歌手』這個身份和獲得的所有榮譽。」
#香港樂壇 #廣東歌 #MIRROR #JER #柳應廷 #Stanely #邱士縉 #姜濤 #叱咤
