雪姨喺盆菜片入面大讚六星級酒店Ritz-Carlton嘅一人前盆菜，網民亦冇收手，反而將戰線延長至Ritz-Carlton嘅Facebook。
噚晚Ritz-Carlton Hong Kong就出post賀年，「虎年將至，在全港最高的酒店啟發您的成功之路。Let us inspire you to be on top and strive for success in the Year of the Tiger!」，不過網民就喺留言區質問酒店立場。
而幾個鐘頭之前，Ritz-Carlton就回應事件，話「酒店並未有進行任何贊助。而有關短片內容，酒店亦沒有參與」。仲另外加咗一句「香港麗思卡爾頓酒店重申，一直尊重不同行業的發展，有望香港飲食業能百花齊放，在疫情下同舟共濟」咁話。
網民睇嚟就唔太收貨，「越話無關係就越惹人挖舊史架喇」，又有人覺得Ritz-Carlton係有主動搵雪姨做廣告，話酒店「所用的網紅手段低級，用酒店跟茶餐廳比較，做衰自己」。甚至仲有人話「如果該名KOL在沒有你們同意下，擅自用你們的產品作惡意宣傳，令你們及該茶餐廳的名譽蒙受損失，你們會否向該名KOL採取法律行動，追究責任？」
睇嚟呢鑊嘢仲有排滾……
