今年到底有幾多中伏盆菜？網上近日出現大量「#三姐盆菜苦主」，話呢間盆菜除咗份量少、似白烚、未夠淋之餘，更加有啲人話啲料又酸又縮，好似食淨一樣。唔少中伏網民話佢哋以為間野有「名人」坐陣，先覺得盆菜質素有保證而幫襯，到底呢位「三姐」係何方神聖？
傳說中嘅「三姐」原名蕭秀香，除咗係著名嘅粵菜廚師，更加係TVB嘅「廚后」，近年做過嘅烹飪節目有《流行都市》、《女人必學100道菜》同《教煮爭霸》等，成功喺師奶之間打響名堂。而三姐盆菜喺TVB嘅Big Big Shop亦都有售，吸引唔少人慕名幫襯，6人盆菜盛惠$888及$1288。
期望越大，失望越大，有中伏嘅讀者親身向Channel C報料，話盆菜 份量少、食材未淋、 無味、寫明係「香酥炸芋頭」嘅芋頭更加無炸過，完全唔值$888，一家人最尾要食埋公仔麵同飯先夠飽。
正當一班受害「三姐盆菜苦主」紛紛喺「香港盆菜關注組」出Post大呻兜嘢難食，其後竟然發現一個已經成立近一年嘅「三姐盆菜苦主谷」FB群組，谷主喺上年已經話個盆菜勁唔掂。不過，見到今年啲盆菜咁樣，睇嚟三姐應該無乜點聆聽食客意見嘞⋯⋯睇返Big Big Shop嘅網頁介紹，盆菜由2022年1月7日至2022年2月8日供應，如果有讀者咁好彩訂咗呢兩日，Channel絲建議你可以去兩餸飯店買淨餸砌過個～😘
