雖然話「炮竹一聲除舊歲」，但市民無論喺邊度放煙花、炮仗都係違法，危險之餘仲會令毛孩受驚。居於元朗嘅梁祖堯昨日下午喺社交平台出post，話喺大棠路紅棗田附近發現一隻被炮仗聲嚇走嘅唐狗，「佢非常之害怕，喺大棠路車來攘往之間走來走去，非常危險。」
阿祖見狀先將狗狗帶返屋企，喺網上呼籲大家將消息廣傳，希望盡快幫狗狗搵返主人。經熱心市民及毛孩守護者義工幫助下，佢哋得知狗狗有晶片，3歲，叫「靚妹」。之後隔咗陣「靚妹」主人終於聯絡阿祖佢哋，阿祖憶述，「靚妹搵返媽媽嘅時候開心到成個跳起不停擺尾，我哋同佢相處咗半日佢都未試過擺尾。」
雖然成功幫「靚妹」搵返主人，但阿祖話呢位主人仲有另外一隻狗走失咗，佢同「靚妹」係同胎嘅兄弟姊妹，樣子基本上係一樣，呼籲各位街坊見到可以先hold 起狗狗，然後聯絡佢。「靚妹」主人亦喺帖文留言多謝阿祖幫忙照顧「靚妹」，話「靚妹」已經安定落嚟，但昨晚搵到而家，仲未搵到「靚妹」阿哥「四眼仔」。而「四眼仔」同「靚妹」一樣樣，顏色偏深色，走失時戴住鐵鍊頸帶，有晶片。
阿祖亦提到每年歲晚好多村會放炮仗煙花，好多寵物都會嚇到走失，昨日亦遇到一個女仔正搵緊一隻金毛犬，所以佢都呼籲大家要好好睇住毛孩，尤其過年過節，「佢哋真係會俾啲炮仗嚇到不顧一切咁樣逃走。既然呢個地球上已經冇人有辦法或願意去阻止違例嘅燒煙花炮仗，咁作為主人就唯有自己小心啲。」
阿祖最後亦分享自己嘅親身體會：「前年我都親身因為咁走失左隻狗，好在有街坊hold住，先至可以團聚。唔係嗰次經歷，都唔會識得見到有狗喺街上邊走失，無論如何都應該hold住佢，否則佢越走越遠或者會遇到交通意外後果不堪設想...」
