富貴KOL雪姨場公關災難梗係冇咁快完啦。事隔一晚，已經有唔少人為基隆發聲，包括光榮冰室、Mee 懲罰師、袁彌明等等。今日（23日）基隆茶餐廳嘅「小小編」就回應事件，引嚟好多網民嘅支持。
小小編一開波就話「實在睇唔過眼有大口KOL 詆毀本餐廳聲譽」，而呢個KOL仲要「藐嘴藐舌仲要帶住不肖（屑）樣詆毀我哋嘅一人盤菜」。小小編今次為咗我地舖頭上上下下所有員工每日辛勞工作付出而出聲，大大聲同雪姨講「生意唔係咁做嘅」。
小小編仲話會考慮告雪姨誹謗，質疑「點解會有牌子搵你做廣告，咁樣嘅所謂廣告完全無質素」。成日強調自己白手興家嘅雪姨，遇上同樣都係白手興家嘅基隆老細，小小編就不禁質疑雪姨「做個KOL 噏得出就噏」。
小小編都不忘多謝其他支持基隆嘅人，「見到客人回圖話好食，好抵食，我地真係好感恩㗎」。而呢個Post只係出咗幾個鐘，就已經有好多人留言撐基隆，包括林卓廷、蕃茄師兄等等。有食咗十幾年基隆嘅網民話基隆嘅嘢食「一向好好食，其實叫佢港女有啲侮辱港女」，又讚基隆有一樣好珍貴嘅一味餸，「叫良心」。仲有另一啲網民仲話支持基隆告雪姨添。
唔知事件最後會點收科呢？雪姨諗住點拆呢？
