姜濤同AGA合作嘅新歌《I Know》MV上傳唔夠幾日，已經有超過50萬Views，足以證明Fans對呢個「混血九胎」嘅喜愛程度。不過，呢段MV昨（21日）突然喺MIRROR嘅官方Channel疑似「被下架」，唔少姜糖都喺網上問點解睇唔到段MV，㩒入去淨係顯示「This video is not available」。
有網民就猜測可能同AGA係環球旗下歌手有關，認為ViuTV同環球傾唔掂MV版權之類。而傳媒向ViuTV同環球唱片查詢，花姐就轉述環球唱片指，「因系統出現故障，現正處理中。」至深夜，MV終可正常收看。
