姜濤舊年喺《Music On The Road》音樂會上，首次唱出「第九胎」新歌《鏡中鏡》，而新歌MV今日就正式上架喇。
《鏡中鏡》由《Master Class》作曲人，同時都係唱作歌手嘅Gareth Tong作曲，而MV嘅短片介紹入面，就講到姜濤成日都會講自己「用作品說話」，而姜濤都寫咗一篇「千字文」畀作詞人小克，希望小克可以「以自己的故事和經歷為背景」嚟講故事，展現姜濤出名之後「面對外界一切聲音時從抗拒逃避、急於反駁到反省領悟、最後從容面對的心路歷程」，從而明白到人生最大嘅敵人從來都唔係別人，而係自己。
MV一開鏡就見到滿面血迹嘅姜濤喺隧道入面起身，之後就一直向前跑，淋住雨嘅佢之後就同一班人打起上嚟，之後仲喺一個醫療室入面嘗試拎返傷口入面嘅異物出嚟。MV入面一直有一班人追住姜濤，直到最後姜濤上到天台，就俾支槍隊住額頭，MV嚟到呢個位就停。
