張敬軒除咗好唱得之外，吹水程度仲爆晒燈，佢近日喺YouTube開嘅新節目《軒公敲碗》前日播出第三集「軒公不設防」，短短兩日就已經由熱門第三位升到第一！咁大件開心事，點可以唔賀一賀佢？
節目入面介紹七仙羽七師傅出場，就以「東方不敗」嚟形容，不過今日流出嘅絕密製作花絮入面，軒公直線抽擊，話七師傅「呢個角度望落去係濟公嚟，但係你正面睇又係東方不敗喇喎」，連七師傅都要問「乜志公（七師傅廣東話）著紅色嘅咩？」雖然係咁，其實張敬軒都係讚緊七師傅可塑性好高，一個字：「正！」
講返個節目，軒仔呢集本身同梁祖堯、強尼傾緊上一代及當代的娛圈女神，點會無啦啦提到七師傅呢？原來七師傅喺佢哋眼中，係「美貌與智慧並重、穿越時空」，「橫空隔世」嘅熱爆女神。身穿黑色緊身one piece嘅七師傅一開波就咬住張敬軒唔放，當強尼問到七師傅最理想嘅亞洲人係點樣，七師傅諗都唔使諗就話係軒仔咁樣，殺軒仔一個措手不及，仲話「做節目請嘉賓一定要好小心」！
有七師傅嘅節目，點會少得改名環節？睇嚟七師傅就唔係太鍾意張敬軒Hins呢個英文名，直接贈咗一個新名畀佢「柴灣Super J」，不過睇嚟軒公想低調啲，都係想叫返「柴J」算喇。冇問題呀，「柴灣Super J」！
七師傅大駕光臨之後，場面秒速失控，三個男人不但問唔到啲個人「事迹」，仲要俾七師傅食住，呢集就笑料百出，唔知下集又會有邊個嘉賓呢？
