冬至過咗，大家可以由食花生湯圓轉返食花生啦～噚日蕾神幫黑人、范范兩公婆澄清佢哋無同王力宏「玩4P」，俾網民揣測佢係再度重擊同樣捲入風波嘅徐若瑄。而徐若瑄今日終於忍唔住，再發聲明澄清佢無介入王力宏嘅婚姻，話「絕無私約、更不是你們口中的
『介入別人婚姻的第三者！』」，仲表示呢篇會係最後一篇聲明，「如再有後續，我會委由司法處理」。
徐喺聲明到話，「連日來的怒罵與不實指控」令佢「心很煎熬、身心俱疲」，指事件嚴重影響到佢屋企人，但亦都令佢見到邊個先係真正嘅朋友。至於網民話佢發聲明係對號入座，佢就反問：「各種躲在影射、比喻、暗示背後的報導和網友們的不實指控，一桶又一桶的髒水往我身上潑，身為女人、是妻子、母親又是公眾人物，我還能不站出來，為自己名聲平反嗎？！」
其實捲入呢場風波後，徐若瑄喺早前嘅聲明已經叫王力宏出嚟解釋，可惜力宏係專業潛水員，除咗搞到徐若瑄一身蟻，亦都令By2嘅Yumi傳出服藥自殺。微博有人爆料，發文引述Yumi身邊嘅工作人員指，Yumi其實只係服用過量「褪黑素」，已經拎埋藥出咗院，希望Yumi真係無事啦～
