電影《梅艷芳》喚起歌迷對梅姐嘅思念，亦觸發梅姐胞兄梅啟明嘅貪念！梅啟明聲稱持有「梅艷芳」商標，入稟高院控告電影《梅艷芳》製作公司安樂影片未經其同意下侵權，要求賠償後，向來同梅啟明共同進退嘅梅媽已鬧個仔「財迷心竅」。網台節目主持潘小文噚晚（7日）更透露，原來梅媽約半年前見梅啟明「包二奶」後，決定經濟封鎖「閂水喉」，認為「咁樣揈錢法唔得喇！」估計梅啟明因為冇錢用所以打電影公司主意；梅媽仲警告梅啟明，「如果唔撤銷訴訟就脫離母子關係」，主持更形容係「最後通牒」。
網台節目《D100娛限奶媽》主持人潘小文噚晚話梅媽仍因為血壓高同氣促留院，情況尚可，但當佢知道梅啟明控告《梅艷芳》後「火都嚟埋」。主持人更引述梅媽話：「四個都係我生，點知走剩呢隻『打壞』定『躝癱』！」
對於梅啟明經常指梅艷芳欠佢好多，梅媽話因為梅姐喺遺產分配上，一蚊都冇留畀梅啟明，所以梅啟明覺得好唔公道，有怨恨，但其實梅姐留畀梅媽嘅生活費，梅媽都有用嚟照顧梅啟明，但梅媽覺得佢「攞得太多，搞唔掂！」
主持人話同梅媽對話後，認為梅媽唔係外界想像中差。而梅媽都話自己年紀大，好多事都控制唔嚟，令梅啟明自把自為，亦承認自己縱壞個仔，但強調一定唔支持梅啟明告《梅艷芳》，警告佢再搞搞陣就唔會畀面，斷絕母子關係。
梅媽又向主持人透露，電影公司籌拍《梅艷芳》時，邀請佢出任顧問，梅媽強調冇向電影公司索取金錢，只要求電影情節唔好詆毀梅艷芳。
