噚日有網民發現，ViuTv嘅母公司注冊咗「Collar」商標，疑似係《全民造星IV》女團嘅名，但更加有趣嘅嘢嚟啦，就係網民發現佢哋仲註冊咗一個商標……竟然係「獎門人」！
查返ViuTv同TVB嘅注冊紀錄，其實佢地各自都有幫兩個台嘅節目或劇集名註冊商標，好似《膠戰》、《使徒行者》等，不過ViuTv喺2018年11月獲政府接納「獎門人」嘅商標申請，唔知用意係咩呢？唔通會出Viu版《獎門人》？
而睇返資料，TVB喺2013年拍完《超級無敵獎門人終極篇》之後，就無再推出同系列嘅節目，但年頭曾經有傳媒報道，無綫副總經理曾志偉有意重啟《獎門人》系列，之後就一直未有下文。有網民就好奇，如果個名俾Viu註冊咗，咁TVB係咪再無《獎門人》節目？如果節目無得叫返呢個名，唔知首席創意官王祖藍會唔會諗到好頭痕呢？
