法例規定，市民搭車必須戴口罩。不過網上流傳片段，九巴上層有男乘客冇戴口罩。車長就未有開車，搞到大班想返屋企嘅市民都好鼓譟。幾個鄉音阿叔圍住個後生仔嚟鬧，唔止爆粗，仲郁手郁腳。有大叔遞口罩畀男乘客，但佢堅持唔戴，話自己「堂堂正正」、「而家係你哋得罪我」。
片長近5分鐘，就嘈足咁耐。有乘客話報警，仲話拍片擺上網公審佢，但無罩男繼續無畏無懼同其他乘客舌戰，其間有唔少乘客忍唔住落車。結果係點？片入面冇交代，但條片的確擺咗上網，仲冇遮樣。Channel絲問咗九巴，但未有回覆。不過點都好，本港疫情仲持續緊，又有Omicron變種，最好都戴番口罩，做個公德心嘅市民啦！
有傳媒其後引述消息，指事發於昨晚（20日）11時許的沙田圍巴士總站。警員接報到場調查，有人出示醫生紙，證明未能佩戴口罩，警方將案件列為「投訴」。根據戴罩令，未滿2歲嬰兒，以及有合法權限或辯解的人，可獲豁免。合理辯解包括該人因身體或精神疾病、損害或殘疾而不能戴口罩；或該人戴口罩後有嚴重困擾。
