竹篙灣啲嘢太難食？ 市民自備雪櫃、微波爐入營

變種病毒Omircron令好多市民都被逼要入竹篙灣「度假」，但入面嘅膳食安排一直都為人詬病，啲飯因為出名無味、款式單調，連立法會議員何君堯之前都要準備一箱零食同杯麵入去（雖然最後無用武之地）。

有身處隔離營嘅讀者就目擊，有人出營時搬走埋雪櫃同微波爐，由於竹篙灣無提供呢兩項電器，相信呢啲嘢係佢哋入營時自備。其實疫情兩年前開始後，網上都流傳唔少隔離「必備物品」，當時已經有人指出膳食問題，要人準備多啲乾糧，但估唔到問題兩年後仍然未解決，即使換埋供應商，都仲有市民被迫選擇帶電器入營⋯⋯😩