喺各位奴才嘅心目中，主子們永遠都係最靚可愛㗎～但唔代表可以俾人偷相牟利囉！😟
Channel C收到讀者報料，話見到有間擺市集嘅網店「The Paw Face」疑似偷咗好多人哋嘅貓相嚟出產品，無論係杯墊、帆布袋定抱枕都有，真係一應俱全，仲要話係「自家設計」添。受害貓貓「寶寶」嘅主人發現事件之後嬲爆，除咗post返對比圖指證外，亦都有問返間鋪到底啲圖嘅來源係咩，但對方竟然答係「參考大量網上圖片覺得適合再繪畫出來」，仲推搪話「如果同品種，覺得相似都唔出奇」⋯⋯嘩，真係咁都有得拗？
Channel C同另一位受害貓貓「金金」嘅主人傾過，佢話件事都係由寶寶主人發現後話畀佢知，仲話一眼已經認得出產品上嘅金金。而金金張相就畀間鋪拎咗嚟做杯墊、抱枕等，主人畀返張原圖Channel絲睇，真係明眼人一睇就知咩事呀～我雖然仲未養到貓，但憑我多年J貓相嘅經驗都知，港短真係無乜可能100%撞樣囉，仲要連角度都一樣喎⋯⋯🤡
Channel C都有嘗試問返間鋪，但截稿前都未有回應，而佢哋嘅網站就依然正常運作緊。
