北角楓林花園3期懷疑出現垂直傳播，港大微生物學系講座教授袁國勇今日（12日）視察完環境之後接受傳媒訪問，除咗講解返個案詳情，仲建議市民可以戴兩個外科口罩，增強過濾能力，唔洗全民戴N95咁話喎。
呢番言論一出，隨即引嚟網上瘋狂討論，除咗有人出Post抽水，專家如港大化學系博士K Kwong都有為袁教授解畫。不過袁教授事後就透過傳媒澄清返，其實佢係想講戴完外科口罩再戴一個布口罩，話咁樣效果會好過N95，建議喺高危地方返工嘅人可以考慮。
其實近日有外國嘅專家都提出同一個建議，解釋布口罩可以提高外科口罩嘅貼合度，可以更加防止Omicron傳播。不過，無論戴布口罩定外科口罩，講到戴兩個罩，香港人平時都應該已經慣晒啦⋯⋯
