北角有野豬襲警！昨晚（9日）8許，北角天后廟道一個停車場有野豬受傷，警員接報到場處理時，野豬疑受驚亂竄撞跌一名警員，並咬傷對方。警員右小腿傷口長達6吋，深可見骨，腰部跌傷，臀部亦被咬，由救護車送院，經治療後沒有大礙。惟野豬慌不擇路，由停車場跳落約10米山坡，傷重死亡，遺體由食環署人員移走。
事發昨晚8時16分，有大廈保安員喺天后廟道26至32號飛龍台2樓停車場，發現一隻野豬受傷，於是報警。3名輔警到場戒備，漁護署人員及後到場協助捕捉。其間，野豬疑感威脅亂竄，一度隱身草叢內，當人員進一步行近時，野豬突撲出撞向一名輔警。警員倒地，被野豬咬傷右小腿和右屁股，背部跌傷。從網上圖片可見，受傷警員坐喺長椅上等候救援期間，臉色蒼白；小腿傷口深可見骨，右面褲管都滲滿鮮血，腳掌亦沾有血迹，要先由同袍幫忙止血。
至於咬傷警員嘅野豬逃走後疑慌不擇路，由停車場跳落約10米下山坡時受傷，漁護署獸醫到場施以麻醉槍將其捕獲，其後證實傷重死亡。
港島過去亦曾有野豬出沒，更不時發現野豬屍體。其中喺今年9月15日，天后廟道26至32號後山位置發現野豬屍體，位置係今次事發現場附近，當時食環署人員到場處理。除咗呢次，柴灣及小西灣過去3個月亦先後發生野豬伏屍草叢案件，其中喺小西灣龍躍徑更加係一個月內有6宗！
漁護署署長梁肇輝之前喺立法會話，野豬市區出沒情況有加劇趨勢，承認現行措施未能有效遏止野豬數目，或考慮將將經常喺市區出沒嘅野豬直接人道毀滅。
