《全民造星IV》噚晚（23日）繼續進行第二回合淘汰賽，由許廷鏗（Alfred）領軍、走文青路線同青春可愛嘅A3組，對決梁祖堯帶領、由多位專業舞蹈員組成嘅B1組。
首先出場嘅A3組，成員有Emiko、Kinki、何佩、Vicky、Candy和同Jade Chan，佢哋喺自選項目以戲劇《剎那的烏托邦》參賽，雖然許廷鏗當時睇到眼濕濕，但評判韋羅莎就覺得佢哋哀傷嘅情緒掩蓋咗唱歌把聲；少爺占亦嫌擔任主角嘅Kinki未夠星味。
之後到B1出場，成員包括方方、馬欣、Jolin、莎莎、榛綦及Miko。佢哋嘅自選項目係跳唱表演《血色祭典》，大晒舞技，馬欣仲除咗白裙展露性感紅色戰衣，經理人Wing睇到都大讚「好索呀！」而評判陳輝陽睇完兩隊演出都話：「覺得呢個對壘好有趣，好似啱啱睇完中學去到夜總會，個反差非常有趣。」節目監製花姐喺後台聽到皺眉話：「咩嘢夜總會呀？」其他參賽者聽完亦O嘴；陳旁邊嘅少爺占就幫手兜：「去咗演唱會好啲喎，去咗夜總會係另一樣嘢嚟㗎喎～」
兩隊之後再一輪Dance Battle，最後5位評判一致投B1組勝出。而落敗嘅A3組中，評判選擇淘汰以靚聲見稱嘅Emiko。
