向來人緣廣、出名富貴嘅KOL雪姨，因為一條盆菜評比片，喺網上引爆咗場公關災難。
事源佢出咗段片比較3間迷你盆菜，包括係酒店Ritz-Carlton售$688嘅一人份盆菜、帝京酒店$788二人份盆菜同埋深水埗基隆茶餐廳$128嘅一人份盆菜。用酒店同茶記比較，就咁聽落都怪怪地，而雪姨喺片中更加大彈基隆唔抵食、蝦肉霉、鮑魚差Ritz-Carlton「太遠」，仲嫌髮菜唔夠多，趁勢插入「金主爸爸」嘅養髮液廣告，最尾只俾2.5分基隆、 而帝京有7.5分，Ritz-Carlton就最高有9分。
呢段片除咗俾網民狠批實測嘅對象錯晒之餘，雪姨亦都被鬧用基隆趁機賣廣告嘅方式「非常唔尊重」。而由於基隆茶餐廳出晒名係良心小店，更加成日會派飯俾長者同埋其他有需要嘅人，令網民更加為基隆感到不值，覺得雪姨非常離地。經過觀眾喺YouTube嘅負評留言同連登Post，雪姨無耐之後就將條片下架，仲喺YouTube社群發聲明道歉，話因為「出邊好少地方有出迷你盆菜」，
所以條片先會咁拍。
所以條片先會咁拍。
雪姨仲話，除咗佢嘅Content team，佢身為老闆都責無旁貸，又以自己搞緊「大乾爹市集」為例，聲稱「引入咗好多有質素嘅小店」、「其實我係同上年一樣都係幫好多小店免費宣傳」。但雪姨並無將呢段道歉聲明擺喺IG同其他平台，只係話希望大家見到道歉文後，「千祈唔好以為我冇將你哋同埋冇將呢件事擺喺心中，唔好覺得我仲係離地風花雪月」。
雖然IG一個相關嘅Post都見唔到，不過雪姨就有覆到網民鬧佢嘅留言，話「嚟緊會為基隆做返啲事」。而一眾討論區嘅網民就似乎就唔多受落，覺得雪姨仍然意識唔到自己問題係邊，又淨係識以Content team做藉口等。唔知大家又點睇呢？
