早前參與《全民造星IV》、出名靚聲嘅Emiko（徐嘉蔚）再喺YouTube post咗新Cover《忘川 X 蜚蜚》，將已故歌手陳僖儀（Sita）嘅作品《忘川》同《蜚蜚》整成一首歌畀大家聽。
唔少樂迷都大讚驚喜，而且感動，覺得Emiko歌聲似當年聽Sita唱歌嘅感覺，「感謝Emiko嘅演繹，感謝天上嘅Sita曾經為樂迷帶嚟如此優美嘅樂章」、「陳僖儀嘅歌聲喺香港樂壇，雖然只有短暫嘅剎那，但卻係永遠都無法忘記。」
Emiko話一直好喜歡聽Sita嘅歌，今次呢個新Cover嘅誕生原來同《造星IV》A組導師許廷鏗有關。Emiko話Alfred之前ig dm同佢講「你好似幾啱唱《蜚蜚》」，佢有問點解，但Alfred只係話「試下就知道」。Emiko嘅歌聲結果感動咗唔少網民，特別係喜歡Sita嘅朋友，勾起大家對佢嘅回憶，Channel絲聽完都覺得耳朵懷孕呀～！
