唔少藝人都會送仔女到外國讀書，黎瑞恩都唔例外，佢長女曾凱栭（Sheree）最近都搭飛機到外國開學。不過黎瑞恩噚日（29日）喺facebook po咗張母女臨別前合照，話「希望幾個月之後可以見啦」之後，就引嚟網民斥責鬧「漢奸」、「崇洋媚外」、「辱華」：「祖國咁強大，你個女讀咩咁巴閉？得外國先有呀？」、「個個都出晒外國仲得了嘅」、「成日話自己點愛國，支持國家, ......依家你轉頭就送自己寶貝仔女去接受100%西方教育，點講都唔會係愛國表現吧？」甚至有網民留言稱「有睇過《長津湖》就唔會再送仔女去外國！」
雖然黎瑞恩被大批網民炮轟，不過都有唔少人鼓勵佢。黎其後亦多次留言回應，今日再反問網民「點解唔可以外國讀書呢？」又話因為囡囡讀嗰科中國係無，所以要去外國學，「唔使出動到漢奸咁嚴重呀？...學完返嚟咪回饋祖國囉！」之後罵戰都未有停止，黎瑞恩再叫「各位充滿憤怒嘅施主，你哋放下啦！唔好嘥咗寶貴嘅時間啦」，仲話唔會再覆留，不過網民就懶理，繼續留言。
