《全民造星IV》噚晚播出第一場25強分組賽，今集首先出場嘅係肥仔做導師嘅「肥仔組」，成員有Candy、Tengie、Winka、Yoyo同暐翹；另外仲有由Anson Kong帶領嘅「AK組」，成員有CK、Ivy So、Marf、芯駖同穎蕎。
嚟到今集，導師肥仔終於講咗好多觀眾心聲，就係「女團最需要元素都係跳唱」。雖然今次分組打亂晒A、B組嘅成員，但「肥仔組」喺相處上都無乜大問題，連被網民認為比較「自我」嘅Tengie，都放棄本身揀咗嘅歌，同組員豁出去跟隨導師肥仔嘅建議，跳經典K-pop歌《NOBODY》。五位成員出場時「禾稈冚珍珠」，着黑色西裝褸遮住套性感BlingBling裝，除褸個吓真係令人「嘩」出聲呀！加埋勁力十足嘅電臀舞，的確係令人眼前一亮。而評判花姐亦都讚Candy唱功有好大嘅進步，又點名欣賞Yoyo今次嘅表現，最後呢組得294.4分。
跟住就到萬眾期待嘅「AK組」，集齊兩位節目大熱Ivy So同Marf，再加上幾位實力派，除咗觀眾，就連評判都對佢哋嘅演出好期待。音樂人CK今次繼續發揮實力，為表演作咗首《I Don't Need That？》，而暖男導師Anson Kong就不時喺訓練期間照顧大家，例如買湯、搬搬抬抬等。可惜到演出嗰陣，唔知係咪因為太過緊張，有幾位成員唱歌都先後失準，評判祖堯更加批評少跳唱經驗嘅Ivy So信心唔夠。雖然Channel C情迷Ivy So，但我哋講野好公平，咁蘇媽之前真係無乜跳唱演出呀嘛！！！！
而CK亦都將成員表現唔好嘅責任「攬晒上身」，同Ivy一樣忍唔住爆喊，好彩有芯駖同Marf出言開解。而呢組，最尾只得248分⋯⋯好擔心呀⋯⋯Channel絲覺得淨係首原創歌都應該值更高分㗎⋯⋯
