2022年1月1日嚟食下花生先，有傳「性感女神」張沛樂（沙律）疑似同Error成員吳保錡鬧情變！
今日有網民發現沙律同保錡嘅IG都互刪咗對方啲相，保錡得返一張合照咋，又話觀察到新年聖誕都冇po過一個story放閃，沙律最近個po仲疑似暗指分手，網民不禁要問「沙律係咪終於醒覺？」
睇返沙律最新嘅po其實就意指工作，仲宣佈推出個人第一本寫真集，只係特別有個hashtag「#過去讓他過去」令人懷疑唔知係咪講緊感情事。
對於佢哋分手嘅傳聞，有網民就話係「遲早嘅事不嬲都唔襯」、又話「沙律大把market」、仲笑保錡「年頭先因為偷食沙律搞到比人雪，之後靠大量賣恩愛去證明自己真愛，點知咁快就散番」。
提起又要話當年，吖唔係，話上年至啱。上年年頭保錡被踢爆偷食沙律，畀人影到佢哋喺元朗工業區附近手拖手行街，令當時正印賴嘉賢（Carrie）無奈被飛。當時就算偷食，兩人都忍唔住低調放閃，各自po單人相，沙律仲話：「天氣很冷，但心很暖。望到大自然的紅葉，擁有屬於我的世界就最幸福。」不過外界就指責保錡係賤男，前度Carrie仲連環爆佢N次出軌，更有多位女網友話佢係「偷食慣犯」曾經發生關係。事件導致保錡被ViuTV雪藏，不過保錡又好識做主動「反省」，反而獲網民支持。其後加上在《ERROR自肥企畫》中，成功完成高難度片石和電結他挑戰，總算挽回形象。
呢一年見保錡處處護住沙律，上年10月先畀過生日驚喜，唔通真係咁容易就「過去讓他過去」？
