做節目最緊要係咩？揸緊宗旨？搞錯喇！最緊要係有Noise吖嘛！
《全民造星IV》就做到喇！唔揀青春少艾，揀超齡實力派，成功撳起「罷睇Noise」！上禮拜五選出60強後，怒火醞釀一日，導師梁祖堯推千字文回應。再隔一日，主持強尼凌晨出po力撐，讚阿祖「善於啟發每個參賽者，令佢哋知道表演係乜，有獨到嘅眼光，睇得出每個人嘅特質，再去發揮甚至作出變奏...諗到最盡為嘅就係想參賽者響觀眾面前變得耀眼。有能力好心地又有愛嘅專業表演者，如果無資格做呢個節目嘅導師，真係唔知邊個有」
緊接就輪到花姐發力，讚阿祖係有心嘅導師，咪延續到話題性囉！話晒家陣對家生日曬冷，仲話兩套台慶劇連住播，無Noise點鬥呀？
雖然對於強尼同花姐嘅加持，網民似乎都唔係好buy，話「有人插梁祖堯無心咩？插佢無眼光咋嘛」，又話睇性格嘅，花姐應該加入，但花姐作為節目監制，有Noise有花生畀大家食，都好正常，如果無野好拗，邊到得黎洗曬版？
另外網民都唔係得個鬧字，有建議畀返花姐，話「搵阿妹 Yanis 梁卓瀅 潘穎芝 右雨 Alina同20強競爭，選出最終10強平息民怨」可惜，強尼世一已經睇穿一切，話「上屆由『中國舞』第一圈晉級暴動咁滯，到佢之後出局個個話要『還我中國舞』。」所以「就算睇法會改變都正常不過」仲話「只要你哋睇落去，你會好似我咁，愛上佢哋每一個。」
