終於真．停課喇！教育局上禮拜六（8日）澄清停課謠言，隔咗3日，林鄭今日宣佈全港所有幼兒中心、幼稚園及小學全部喺禮拜五或之前停面授課至農曆新年假期後，不過中學現階段就繼續面授。林鄭又話過年後會安排外展隊，去學校為5至11歲學童接種科興，BabyKingdom嘅父母非常高興，話「外展服務好呀，原本想帶阿仔出去打，而家等學校嚟同同學仔一齊打」、「仲要過埋個新年假，我想直接帶小朋友去診所打」。另外，林鄭話留意到唔少企業宣佈咗WFH，唔使政府開口講。今日本港新增21宗確診個案，13宗輸入、8宗本地，另外初步確診有5宗。

噚日有人問點解仲講洪門宴，因為啲嘢唔係一次過講清楚囉！「少女」榮源茶行太子女王詩雅去洪門宴之前，原來唔止同5個朋友飲酒，連飲酒地址都唔清唔楚。今日衛生防護中心傳染病處主任張竹君開記者會，被問到王詩雅去洪門宴前同朋友飲嘢嘅地址，就承認自己之前講嘢，「紀錄係155號地下3號，係私人地方。」除咗講錯，原來都有寫錯，根據網上資料同讀者報料，聯交所一份文件入面，曾將一名上市司非執董嘅地址寫錯，將「干諾道西155號高樂花園」寫錯做「115號」。高樂花園有兩間餐廳，一度有懷疑係星薈館，嗰度有VIP房，係私人會所，唔接受街客。但張竹君就話唔係，「嗰個地方應該唔係星薈館，係一個地方拉咗閘嘅，應該唔係有招牌或者營業，所以你哋（記者）可能搵唔到。」又話嗰度似屋企，唔係表列處所，所以整棟155號大廈逗留過嘅人士都要強檢。

Channel絲發現155號有間賣酒嘅鋪頭「WineWorld」，營業時間至夜晚9點，同「少女」半個鐘後出席「洪門宴」時間吻合，我哋打過去問，職員就話「我哋唔清楚」。Channel絲再查返資料發現，「WineWorld」創辦人係金紫荊女企業家協會主席林淑怡，2020年曾經頒過「世代傳承獎」畀王詩雅，當時活動同場仲有「洪門宴」主角洪為民。

張竹君亦有交待王詩雅嘅飲酒聚會，話「有一位人士攞咗個地方同啲朋友飲下嘢，或者係開會，即咗之前提及嘅5位人士，當日在場嘅仲有大概7,8位人士，都送去檢疫中心。」竹君話呢7至8個人無出席洪門宴。

呢次洪門宴花生指數極高，仲引爆政界同官場大戰。前民政事務局常任秘書長楊立門喺《南華早報》登公開信，話1月3號「洪門宴」時政府未有禁止聚會，有確診者出席純粹係「不幸」，反問違反咗邊條法例或者行政守則，仲踢爆林鄭喺11月底至12月初都去過婚宴。林鄭就解釋話只係去咗10分鐘，係出現Omicron社區傳播個案之前。