太陽城集團創辦人周焯華（洗米華）涉非法助內地人在網上賭博，先被內地批准逮捕、再被澳門司警拘押。但外界除咗關注佢會唔會被「共同富裕」，亦都好關心佢太太陳慧玲（Heidi）同舊愛Mandy Lieu嘅近況。
當年仲係名模的Mandy Lieu，喺2014年被爆出介入洗米華同Heidi之間嘅婚姻，仲俾人影到佢喺賭場做洗米華嘅「人肉梳化」，照片哄動全城㗎～而Mandy同正印Heidi兩個女人嘅「搶米戰」亦都就此展開，兩個女人不時隔空用言語、行動明爭暗鬥，最後Mandy雖然幫洗米華生咗3女一子，但依然都鬥唔過正印，2019年被傳袋咗3億分手費後就同埋仔女返英國住。
遠離是非嘅Mandy，早前用2,800萬英鎊（約2.9億港元）購入佔地約374公頃嘅Ewhurst莊園，目標係成立生產有機產品嘅生態農場。佢仲轉型做網上雜誌《Sublime》嘅專欄作家，營造才女形象。Mandy最近喺專欄好開心咁寫話，佢嘅蘋果園開始有收成，仲歡迎啲人去參觀同支持，睇落非常開心。
不過，雖然Mandy而家生活唔錯，但上年近照曝光時都有傳媒將佢同Heidi拎嚟比較，話Mandy唔襟老、貌似C朗，而Heidi就Keep得好好，仲有個浪子回頭嘅老公。喺洗米華被批准逮捕嘅消息流出後，兩位曾經鬥生鬥死嘅女人，今次竟然行為意外地一致，就係將IG set做private。唔知呢次邊個會係最大贏家呢？
