蕾宏婚變粒花生食極未完！今日爆出有份捲入風波嘅BY2細孖Yumi疑似服藥輕生，送院急救，但被醫護踢爆自編自導自演？！
有位自稱係Yumi嘅朋友喺微博出po，tag王力宏話：「Yumi吞藥輕生在醫院洗胃急救，@王力宏你最清楚Yumi根本没有介入你一地雞毛的婚姻，如果她真的出甚麼事情，我絕不原諒！」
但有網民懷疑呢位「朋友」其實係Yumi另一個帳號，服藥都疑似係佢自編自導自演，因為有自稱係醫護嘅網友喺微博爆料，話Yumi只係吞咗兩粒維生素同2粒褪黑素，係Yumi自己打電話去急症，凌晨5點入院，朝早9點出院，急症醫生仲爆Yumi「生命體徵特別穩定」。網民寸Yumi畀李靚蕾爆料，迫到無得唔認，服藥都改變唔到佢係炮友第三者呢個事實。
蕾宏婚變呢件事too long to read，Channel絲就整合一下Yumi呢條戰線：
時間回到12月17日深夜，先係李靚蕾出千字文踢爆王力宏出軌、召妓、偷食人妻等等，當中提到一個「她」，喺ig出過po嗌王力宏做"宏宏"，呢個「她」就被懷疑係女團By2細孖Yumi。
12月18日Yumi強勢出招，話報咗警畀人誹謗，點知一邊畀網民質疑報案紙造假，一邊李靚蕾就即刻反擊，話「請把警察聯繫方式給我，我提供證據。」
12月19日Yumi轉打同情牌，出千字文澄清無介入蕾宏婚姻，承認同過王力宏拍拖，不過已經係2012年嘅事，形容「雖然時隔久遠，但刻骨銘心」，指自己係前女友而非砲友，仲cap埋對話圖出嚟做時間證明，當到喺2012年王力宏好關心Yumi好sweet，到2013年分手後，王力宏就分享話自己有新戀情，當時係2013年10月，同蕾宏開始拍拖時間吻合。對於IG合照，Yumi就話係2013年拍攝，2015年先po出嚟只係想激下當時嘅男朋友，仲話佢同王力宏一早就互刪微信好友。李靚蕾見到就出絕招，原來早喺2015年已經搜集王力宏偷食證據，反駁Yumi話互刪微信好友呢點，po出Yumi同王力宏喺2015年嘅對話截圖，證實兩人改用Whatsapp溝通，頭像仲要係裸照！
Yumi被正式K.O.，無再出聲回應，直到今日爆出服藥自殺疑雲，而李靚蕾就被網民封為「蕾神」，握有「蕾神之槌」。
另外，仲有粒小花生，有網友發現Yumi同何猷君戀情喺2014年曝光，至2015年12月先分手，而李靚蕾po出嚟嘅Whatsapp對話圖係2015年8月，惹來Yumi派帽猜測。
另外，今日就事件再有所動作嘅仲有人妻徐若瑄，因為捲入蕾宏婚變而喺IG發出第三篇聲明，話『我，徐若瑄沒有介入李王的婚姻，絕無私約，更不是你們口中的「介入別人婚姻的第三者」』，聲言如果再有後續就交司法處理。
網民即刻留名，想睇下蕾神會唔會又有嘢爆，又話如果真係無做過，可以「拜託蕾姐出po澄清咪得囉」，因為李靚蕾昨晚（21日）就出po幫黑范夫婦澄清，指佢哋同王力宏無不正當關係，就因為呢個po令網民聯想到排除法，變相畀壓力徐若瑄。不過根據《蘋果新聞網》報導，李靚蕾話出po唔係影射徐若瑄，而係受託幫黑人同范范澄清。
