網傳一段片，有位大媽為咗回收1個膠樽有$0.1回贈，竟然用樽蓋呃部回收機。又有讀者向我哋報料，影到兩老為咗爭紙皮大打出手，紙皮姐甚至狼死到用𠝹刀兇清潔工。可能你會覺得佢哋係貪小便宜，但亦可能真係搵食艱難！
第五波疫情影響咗好多人停工，講緊係停工一個月，新年檔期簡直損失慘重！本港今日又再新增9宗確診，涉及4男5女，其中1宗仲係本地源頭不明個案，衞生防護中心話唔排除仲有隱形傳播鏈。
林鄭今日無戴口罩開記招，一嚟就show數據話香港防疫得好，畀掌聲？畀香港人自己！然後林鄭又再話今次爆疫截斷得好快，但點知都係要延長禁晚市堂食同停業令兩星期，至到下個月3號大年初三，仲宣佈取消大型活動包括全港15個年宵花市、新春市場同旅發局嘅新春活動。即使年初四有望放寬，都要以疫苗氣泡作為基礎。
林鄭強調做好晒通關嘅籌備工作，希望香港人同心協力應對今次因Omicron引起嘅疫情。為咗舒緩業界損失，政府會向投咗年宵花市攤位嘅人，退回全數洗費，再派攤位使用費百分之五十做特惠金。此外，再推第5輪防疫抗疫基金，話今次1個禮拜就有係好快，之前都要爆疫後成個月先搞到。第5輪有補助總額有35.7億，比第4輪64億少咗一半，獲發放嘅錢當然都少一半。
不過快手派錢之餘，別忘記調查工作，有線記者喺記者會上問：「 關於洪為民生日聚會，徐英偉、歐家宏都係檢疫緊，可唔可以確認到歐家宏有冇掃安心出行呢？內部紀律嘅跟進工作進度係點？會唔會要求徐英偉或者歐家宏就此事引咎辭職呢？」佢再問埋舉辦225人生日派對間餐廳有冇違反防疫規定，有關調查做成點，而王詩雅被指隱瞞行蹤，又會唔會執法。林鄭回應話生日聚會涉及嘅政府官員一共15位，但呢刻內部調查未完成。而生日派對餐廳調查則由食衞局局長陳肇始回應，佢話會跟法例做刑事調查，如果有發現任何違規都會係有檢控，會確保調查同檢控程序公平公正。
Channel C提一提陳局長，記得要調查食環轄下嘅物料供應組，上月大搞半百人聖誕聚餐，無視599G同599I除罩合照一事！
