葵涌邨爆疫連封6座，包括逸葵樓、映葵樓、芊葵樓、曉葵樓、旭葵樓和雅葵樓，相對當然要動用大量人力物力，搞到大垃圾桶都裝唔晒啲防護衣，有居民就擔心會播毒，認為除咗之後嘅清潔工人危險，病毒亦有機會附在工作人員嘅衣物做成傳播。
其實圍封期間，葵涌邨幾棟大廈嘅環境都好污糟，好似逸葵樓就淪為垃圾崗，好多層嘅垃圾桶都打爆晒，啲食物殘渣仲瀉到一地都係，有居民擔心抗疫變染疫。就算等到有垃圾車嚟，都同檢測站好近，唔少居民就喺隔離排緊隊，居民就質疑點解倒垃圾，唔可以同檢測時間分開，或者將檢測站搬遠少少
唔知係咪困住幾日困到人都癲，有條友竟然喺邨內周圍噴口水，街坊要報警處理。以上種種問題，唔知落區視察15分鐘嘅人睇唔睇到，又會唔會跟進呢？
葵涌邨已經累積檢測出超過170宗確診或初步確診個案，逸葵樓126宗，映葵樓41宗，雅葵樓2宗，曉葵樓、旭葵樓、春葵樓和芊葵樓都各有1宗。至於本港今日疫情新增140宗確診，包括15宗輸入和125宗本地感染，初步陽性個案就過百宗。另外，有4宗源頭不明個案，包括居大窩口邨嘅18歲學生、居藍天海岸嘅6歲男童、居大圍美柏苑嘅31歲女子和居新港城中心、從事電梯維修嘅44歲男子。
政府專家顧問袁國勇就話未來7至14日，將會出現更多新冠變種病毒嘅確診病例，仲預計確診個案會「幾何級數增長」，如果控制得唔好，分分鐘要搞2、3個月。至於葵涌邨係咪要「封邨」呢？袁國勇又話言之尚早，做5日強檢就得，仲叫葵涌邨居民唔使驚，因為Omicron嘅病毒複製能力低，少啲出街同戴兩個口罩就得喇！至於林鄭開記招唔帶口罩，袁國勇就話作為社會領袖應該以身作則，畀市民知道Omicron傳染性高，要提高警覺。袁教授仲好老實咁話畀大家知「搞清零」無用，因為「清零」唔係目的，係「買時間」畀社會打疫苗嘅手段，佢話要嚴格執行「疫苗氣泡」，人人打針先可以減低重症，確保唔會癱瘓公共醫療服務。
現估計年初四無乜可能放寬社交距離措施，餐飲聯業協會會長黃家和就估計，1、2月業界就損失80億生意，預期食肆喺3月份將會出現結業潮，呼籲政府初四畀返晚市堂食到8點。Channel C都收到有餐廳「後生仔海南雞.1998」嗌晒救命，唔夠錢交租，仲有喺逆市之下仍關心送暖嘅基隆茶餐廳都好需要大家支持。
