Channel C收到消息，疫情下唔少賭仔冇得過大海，真係幾手痕，所以啲地下賭場遍地開花，全港多達80幾個。我哋之前就觀摩過，大部份地下賭場都「藏身」喺工廈單位，唔係有「盲公竹」真係入唔到去。
場外場內都守衛森嚴，唔單止工廈外有「天文台」，工廈內、後樓梯都有，CCTV更加多到一步一驚心，入口以雙大門設計，首先要撳密碼入咗大門，經過玄關再入鐵門，真係同入銀行保險庫差唔多。
入到去真係大開眼界，規模儼如澳門「小葡京」啲賭廳咁，全場人數近百人，好不熱鬧。約1000呎嘅單位放咗6張枱，有3張百家樂枱、1張21點、1張三公同張牌九枱，全部賭客以籌碼落注。每張枱每口價上落，由200元至10萬不等。一晚賭額高達400、500萬元。
賭客賭得興起，除罩、食煙乜都齊，場內有茶水供應，更有無限放數。為免賭客輸大走數，帶客入場嘅蛇頭唔單止有佣抽，仲要孭飛，所以「鐵竇」唔易被攻破。
不過，警方都有好多線眼，過去幾個月冚咗唔少地下賭場，但由於開業成本低，幾萬蚊搞掂、賭枱、賭具全部經內地網購，呢頭冚完，轉頭又開過！
