政府大派$5,000消費券，第一期$2,000今日終於到手，相信唔少人都諗好點樣振興經濟。不過，上年同今年離港去外國讀書、移民、工幹，甚至因為疫情滯留外地返唔到嚟嘅港人，因為未能在港消費等如見財化水，於是會拜託在港親友幫忙折現，甚至出現類似「中介」的角色。
Channel師訪問咗一位「中介」成哥，上年政府派1萬元現金時，已經有幫海外朋友登記，當時幾經轉接，最終都幫到朋友袋袋平安。今次成哥再照辦煮碗，「啲老友話，整到固然好，整唔到都預咗冇！」結果成哥最後又真係成功幫佢哋登記到，之後一傳十，十傳百，喺過去兩星期，就有嚟自英國、加拿大、澳洲同大陸約過百位港人搵佢幫手登記！
成哥話今次成本高又費時，坦言有向每人收返一成手續費，賺到超過5萬元，仲話可以「買部iPhone 13獎勵下自己囉！」佢話只係登記已經手續繁複，要買過百張電話卡同八達通，「仲要幫佢哋消費，消完費再匯返晒畀佢哋，100個人20萬元，兩個月內要使晒！」成哥話折現方法都不外乎買金或者買現金券，而三期消費券加埋，就要折現超過50萬元。
